Русија соопшти дека ќе одржи безбедносни разговори со САД и Украина во Абу Даби, но по состанокот меѓу претседателот Владимир Путин и американските претставници кои пристигнаа во Москва предупреди дека траен мир нема да биде можен доколку не се решат територијалните прашања.
Претседателот Путин ги угости мировниците Стив Виткоф, Џаред Кушнер и Џош Груенбаум во Кремљ. Средбата траеше речиси четири часа. На руската страна им се придружија и претседателскиот советник Јуриј Ушаков и специјалниот претставник Кирил Дмитриев.
По состанокот, Ушаков рече дека разговорите биле конструктивни и дека ќе следат безбедносни дискусии во Абу Даби подоцна денес меѓу руските, украинските и американските претставници.
Гостите на рускиот лидер „ги споделија од прва рака своите впечатоци и нови оценки за средбата на американскиот претседател во Давос со неговиот украински колега Володимир Зеленски“, истакна Ушаков, нагласувајќи:
„Најважно е што за време на овие преговори меѓу нашиот претседател и Американците уште еднаш беше потврдено дека без решавање на територијалното прашање според формулата договорена во Енкориџ, нема надеж за постигнување долгорочен договор“.
Во исто време, Ушаков додаде дека сè додека не се постигне договор за решавање на украинската криза, Русија ќе продолжи да ги остварува своите цели на бојното поле каде што „руските вооружени сили ја држат стратешката иницијатива“.
Украинскиот претседател Володимир Зеленски вчера изјави дека документот во кој се наведени безбедносните гаранции на САД за Украина е готов, но додаде дека територијалните прашања сè уште не се решени.
Зеленски им рече на новинарите на Светскиот економски форум во Давос дека и Русија и Украина мора да направат компромиси во мировниот процес и дека претстојната трилатерална средба меѓу високи украински, руски и американски претставници е „позитивен чекор“.
Во меѓувреме, руските напади продолжуваат, а ракетните и беспилотните летала врз украинските градови во последните недели оставија милиони луѓе без греење и електрична енергија во текот на една од најстудените зими во последниве години.