Косовската претседателка, Вјоса Османи изјавила за Би-Би-Си дека постојат многу причини зошто Косово стана дел од Одборот за мир, кој го иницираше американскиот претседател Доналд Трамп, наведувајќи дека Косово знае како да постигне мир.
Османи рекла дека пред 26 години интервенцијата на Соединетите Американски Држави, со поддршка на Обединетото Кралство и други демократски земји, „спаси животи и го отвори патот кон мир, слобода и независност на Косово“, пренесува РТК.
„Да се вратиме во времето, пред 26 години. Косово беше земја уништена од војна. Врз народот на Косово беше извршен геноцид, а под водство на Соединетите Американски Држави, се разбира со поддршка на Обединетото Кралство и многу демократски земји низ целиот свет, нашите животи беа спасени. Ни беше дадена шанса за мир. Ни беше дадена шанса да живееме слободно. И денес сме суверени, демократски, независни и, најважно, нашите деца се првата генерација во историјата на нашата нација што не доживеала војна и ужива во мир“, рекла шефицата на Косово.
Според неа, Косово знае како да постигне мир, а тој се постигнува преку акција.
„Тогаш бев дете на војна, растев под гранати и како и сите на мои години, нашите животи беа во опасност. Но, суштината е следнава: она што го слушавме тогаш беа резолуциите на Генералното собрание на ООН. Тие беа парчиња хартија, зборови, но немаше никаква акција, сè додека САД не интервенираа и не го мобилизираа светот да ни помогне“, нагласила Османи.
Таа оценила дека на светот му е потребна „силна меѓународна организација која се занимава со создавање и постигнување мир“, додека ООН „ќе биде вклучена во мировните операции, што е она што го прави најдобро и го правела со поддршка на многу земји и во Косово повеќе од 10 години“.
На прашањето дали Одборот за мир се стреми да ги замени ООН, таа рече не.
„Не, сосема спротивно. Како што реков, овие организации можат да работат рака под рака, човек е вклучен во создавање и постигнување мир“, рече Османи.