Претседателот на Конфедерацијата на слободни синдикати на Македонија, Благоја Ралповски смета дека барањето на ССМ за покачување на минималната плата за плус 200 евра е популистичко барање. Вели дека сите сакаме да имаме 600 евра минималец, но објаснува дека посакува системско решение – промена на Законот за минимална плата и да имаме минимален работен час.
Околу протестот на ССМ закажан за 28-ми јануари и дали ќе дадат поддршка како КСС, Ралповски кажа дека разговараат во синдикатот, по што денеска ќе го кажат својот став од нивните членови.
-Ако се секираат толку, дали они не поддржаа кога во претходните години баравме усогласување согласно закон? Ако излезеа да не поддржат, ако не молчеа како риби и не се поклонуваа пред претходната Влада, сега ние природно ќе имавме 500 евра минимална плата. Кога имавме покачување на минималецот, другите плати не се покачуваа. Дајте да седнеме и да најдеме системски решенија, рече Ралповски во емисијата „24 анализа“.
Главното барање на протестот на ССМ е зголемување на платите за најмалку 6.000 денари и покачување на минималната плата на 600 евра.
Протестот ќе започне во 17 часот пред Работничкиот дом, ќе продолжи пред Собранието и Стопанската комора, а ќе заврши пред Владата, при што првиот човек на ССМ, Слободен Трендафилов предупреди дека борбата ќе продолжи доколку барањата не бидат прифатени.