Европската комисија денес најави поддршка во вредност од 171 милион евра за подобрување на развојот на инфраструктурата и приватниот сектор во Западен Балкан. Македонија, Босна и Херцеговина, Црна Гора и Албанија ќе ги добијат средствата, а финансискиот пакет одобрен денес, како што истакна Комисијата, ја зајакнува посветеноста на ЕУ кон одржлив раст и регионална поврзаност во Западен Балкан.
Новиот пакет за поддршка вклучува средства од различни извори на финансирање од ЕУ – придонеси од Инструментот за претпристапна помош (IPA III) за проектот во БиХ, придонеси од билатерални донатори од Инвестициската рамка за Западен Балкан (WBIF) за проектот во Црна Гора и придонеси од Инструментот за реформи и раст (RGF) за проекти во Албанија, Црна Гора и Македонија.
Европската комесарка за проширување, Марта Кос изјави дека инвестициите во партнерите на Унијата од Западен Балкан се клучни за нивното приближување кон ЕУ.
„Во текот на повеќе од две години од усвојувањето на Планот за раст за Западен Балкан, работевме, меѓу другото, преку Инвестициската рамка за Западен Балкан, на претворање на обврските во акции. Од подобрување на инфраструктурата до подобрување на развојот на бизнисот, овие инвестиции создаваат реални можности за граѓаните“, истакна европската комесарка.
Од вкупниот износ, 91,8 милиони евра се наменети за инфраструктурни проекти во четири партнери на ЕУ во Западен Балкан. Се очекува средствата да мобилизираат вкупни инвестиции од 263 милиони евра за седум проекти во приоритетни сектори, вклучувајќи дигитализација, чиста енергија, човечки капитал, транспорт и животна средина.
Поточно, станува збор за имплементација на широкопојасна инфраструктура во Албанија, подобрување на системот за пренос на електрична енергија во Македонија, изградба и енергетски ефикасно реновирање на образовни институции во Македонија и Црна Гора, електрификација на пругата Драч-Тирана во Албанија и проектот за прочистување на вода за пиење и отпадни води во Босна и Херцеговина.
Комисијата објави дека овие проекти ќе ги спроведуваат партнери од ЕУ од Западен Балкан заедно со меѓународни финансиски институции.
Дополнително, 2,9 милиони евра се наменети за четири проекти за техничка помош во Албанија и БиХ за поттикнување на идните инвестиции во енергетика, вода, иновации и истражување.
Вториот дел од пакетот, во вредност од 76,3 милиони евра, претставува придонеси за програми што го поддржуваат приватниот сектор, вклучувајќи ја Програмата за напредување на Западен Балкан, Програмата за мали и средни претпријатија „Биди зелен“, пилот-програмата Можности за Западен Балкан во нетрадиционално задолжување (W-BOND), како и зајакнување на капацитетите на јавно-приватните партнерства и администрацијата во БиХ.