Односите на Велика Британија со Кина се добри, но покренавме некои тешки прашања, изјави британскиот премиер Кир Стармер при посетата на Пекинг, соопшти БНР.
Кир Стармер рече дека имал „многу добар, конструктивен состанок“ со кинескиот претседател Си Џинпинг и дека тоа ќе доведе до „посилен однос“. Во изјава за медиумите по состанокот, британскиот премиер рече дека е постигнат добар напредок во царините за виски, безвизното патување во Кина и споделувањето информации и соработката во врска со нелегалната миграција, со посебен фокус на малите чамци и деловите за мотори.
На прашањето како би им одговорил на оние во Велика Британија кои би можеле да бидат загрижени за блиските односи на премиерот со Кина, Стармер рече:
„Она што им го кажувам на сите овде е дека секогаш дејствувам во наш национален интерес“.
Премиерот рече дека во врска со човековите права го покренал случајот Џими Лаи и третманот на Ујгурите.
Од своја страна, Си Џинпинг рече дека односите меѓу Велика Британија и Кина претрпеле „пресврти“, но додаде дека Кина е подготвена да развие „долгорочно и конзистентно стратешко партнерство“ со Британците.
Претседателот Си зборувал за „турбулентен и динамичен свет“ со јасна импликација дека Кина е светилник на стабилност во услови на каприциозност, испади и непредвидливост на претседателот Трамп.
По средбата со претседателот Си, Стамрер беше придружуван до Забранетиот град во Пекинг. За време на неговата тридневна посета, тој ќе има уште многу деловни и културни средби пред накратко да застане во Јапонија на пат кон Велика Британија.