Реакцијата следува по неодамнешните контроли спроведени од Фондот за здравствено осигурување, при кои било утврдено дека дел од пациентките плаќале здравствени услуги кои, според важечките прописи, треба да бидат обезбедени бесплатно.
Од редовите на матичните гинеколози велат дека не станува збор за злоупотреби, туку за недоречени и неусогласени правила во системот, кои создаваат простор за различно толкување. Поради тоа, тие бараат ревизија и прецизирање на договорите што ги имаат склучено со Фондот за здравство.
Од Министерството за здравство, пак, информираа дека ќе ги разгледаат барањата на гинеколозите и најавија дека упатствата и процедурите ќе бидат усогласени со современите медицински стандарди, со цел да се надминат постојните недоследности во системот.