Македонска асоцијација на новинари (МАН) денеска упати јавен повик до Јавното обвинителство по службена должност итно да преземе мерки против лица кои, како што наведуваат, јавно и со полно име му се закануваат на новинарот и уредник во ТВ „Канал 5“, Александар Видиновски.
Од МАН информираат дека по објавувањето видео-снимка поврзана со непрописно паркирани возила пред бугарската амбасада, Видиновски бил изложен на серија закани, говор на омраза, ксенофобија и пораки кои поттикнуваат национална нетрпеливост, вклучително и директни закани по неговиот живот.
Според Асоцијацијата, дел од заканите содржат повици на насилство и претставуваат сериозно кривично дело, кое, согласно Кривичниот законик, се квалификува како закана кон службено лице. Во реакцијата се наведува дека заканите не се насочени само кон конкретниот новинар, туку содржат и пораки кои се однесуваат на македонскиот народ и повици за насилно уривање на уставниот поредок на државата.
МАН оценува дека ваквите постапки претставуваат директен притисок врз уставно загарантираната слобода на говор и обид за заплашување со цел спречување на новинарското известување за прекршувања на законите, без разлика дали станува збор за домашни или странски институции и претставништва.
„Со ваквите закани не се загрозува само безбедноста на еден новинар, туку се создава атмосфера на страв која може да има сериозни последици врз слободата на медиумите и врз правото на јавноста да биде информирана“, се наведува во соопштението.
Македонската асоцијација на новинари апелира надлежните институции да постапат итно и ефикасно со цел заштита на новинарите и спречување на понатамошна ескалација на говор на омраза и закани.