Германскиот канцелар Фридрих Мерц се пожали на овациите што ги доби американскиот државен секретар Марко Рубио на Минхенската безбедносна конференција, велејќи дека неговиот говор всушност бил политиките на Доналд Трамп во „попријателско пакување“, пренесе ДПА.
„Не бев во салата, а дури и да бев, тешко дека ќе станев“, рече Мерц во политичкиот поткаст Machtwechsel, кој ќе биде објавен во целост подоцна денес.
Мерц истакна дека говорот на Рубио не бил толку конфронтациски како оној што го одржа потпретседателот на САД Џ. Д. Венс на истата конференција минатата година. Сепак, тој додаде дека неговата содржина е сепак одраз на политиките на претседателот Трамп, само во „попријателско пакување“.
Канцеларот ја објасни реакцијата на публиката со фактот дека публиката била задоволна што пред нив стои Американец кој сè уште им се обраќа како пријатели.
„Самото тоа предизвика одредена емоција. Не би било доволно за мене, но очигледно беше доволно за публиката“, рече Мерц.
Во саботата во Минхен, Рубио се залагаше за оживување на трансатлантското партнерство, но во исто време јасно стави до знаење дека таквата соработка ја гледа исклучиво под условите што ги диктира администрацијата на Трамп, пренесe агенцијата ДПА.
Говорот на Рубио во баварската престолнина, во кој тој нагласи дека „САД и Европа си припаѓаат едни на други“ и дека судбините на двата континента „секогаш ќе бидат испреплетени“, беше поздравен со силен аплауз од публиката.
Иако постојано нагласуваше дека Вашингтон сака да соработува со Европа, Рубио сепак предупреди дека алијансата треба да се поправи. „Не сакаме слаби сојузници и не сакаме да бидеме учтиви и тивки чувари на пропаста на Западот“.
Зборувајќи за миграцијата, тој рече дека Западот може да напредува само ако ги контролира своите граници. „Ова не е израз на ксенофобија, туку фундаментален чин на национален суверенитет“, нагласи тој.
Тој ги критикуваше политиките за климата и миграцијата на претходните американски администрации и некои западни лидери, велејќи дека „климатскиот култ“ ги осиромашил луѓето и е „закана за нашата иднина“.