Министерот за внатрешни работи, Панче Тошковски изјави дека е горд на имплементацијата на новиот систем „Безбеден град“ (Сејф сити) и дека бројот на прекршоци драстично се намалил, имено од 120 илјади колку што беше на почетокот во фазата на тестирање, сега има само 500 прекршоци.
Тошковски во емисијата „Клик Плус“ нагласи дека времето на опасно однесување и брзо возење по патиштата е завршено.
„На почетокот на тест-периодот, бројот на прекршоци беше 120.000, додека денес имаме 500 до 600 прекршоци, некои денови 700 или 800, но сепак значително помал број на прекршоци. Станува збор за прекршоци за пречекорување на дозволената брзина, поминување на црвено светло или управување со нерегистрирано моторно возило. Ова се прекршоците што системот ги детектира. Во иднина, ќе го применуваме и за погрешни запирања и погрешно паркирање. Нема лице кое вози моторно возило во Скопјe кое не ги гледа придобивките од овој интелигентен систем. Нема повеќе неуредно однесување на патиштата, нема повеќе лудо пребрзо возење, а тоа е забележливо. Нема повеќе таа нетолеранција. Бројот на несреќи се намалува, бројот на повредени и мртви исто така се намалува; целта што сакавме да ја постигнеме доби многу позитивен одѕив од јавноста“, изјави Тошковски.
На прашањето што се случува ако возило помине на зелено светло на семафорот, но поради густ сообраќај заврши на средината на раскрсницата, Тошковски рече дека во вакви случаи тоа ќе се третира како прекршок, но со различен третман, односно не како поминување на црвено светло на семафорот, туку како попречување на сообраќајот на раскрсницата. Казната ќе биде 45 евра.
„Значи возачот мора да направи проценка дека сообраќајот ќе се закочи ако помине на зелено светло, и ќе мора да застане. Имаше во тест периодот и такви ситуации, и камерите ве идентификуваат како да сте поминале на црвено, и покрај тоа што сте влегле на зелено. Но, сето тоа го отстранивме, и тој прекршок нема да биде констатиран како поминување на црвено, туку како угушување на крстосница“, кажа министерот за внатрешни работи.