Планираните разговори меѓу украинскиот претседател Володимир Зеленски и неговиот француски колега Емануел Макрон за начините за вршење притисок врз Русија само ќе го попречат мировниот процес, предупреди денес Кремљ.
„Режимот во Киев продолжува со својата доследна линија на попречување на мировниот процес“, изјави портпаролот на Кремљ, Дмитриј Песков, за новинарите како одговор на прашање на АФП: „Самата идеја за обид за вршење притисок врз Русија е апсурдна.“
Порано, француското претседателство објави дека Макрон утре ќе биде домаќин на разговори со Зеленски, кој денес пристигна во Букурешт на разговори со неговиот романски колега, Никош Дан.
Фокусот на денешниот состанок е на зајакнување на соработката во области како што се енергетиката и одбранбената индустрија, како и улогата на Романија во процесот на реконструкција во Украина, објави Радио Романија.
Внимание се посветува и на безбедноста на источното крило на НАТО.
Синоќа, парламентот во Букурешт одобри предлог Романија да прифати американски авиони за полнење гориво, опрема за надзор и сателитски комуникации за американските операции против Иран. Дел од дополнителната опрема и воениот персонал ќе бидат стационирани во близина на Констанца до 90 дена.
Во меѓувреме, Русија соопшти дека Украина извршила неуспешен напад со беспилотни летала врз компресорската станица „Рускаја“ во Краснодарскиот крај, која снабдува гас преку гасоводот „Турски тек“, а Украина соопшти дека украински беспилотни летала ја погодиле пумпната станица Тихорецк, исто така во Краснодарскиот крај.
Тоа е еден од најважните центри за снабдување со нафта во јужна Русија и вклучува големо складиште за нафта и терминал, изјави украински функционер. Руските власти соопштија дека пламените јазици се прошириле на 150 квадратни километри.