По одлуката на Тетовскиот суд, со која Арбен Таравари беше признат за лидер на Алијансата за Албанците и печатите на партијата му припаѓаат на неговото крило, реагираше Алијанса на Зијадин Села. Тој порача дека одлуката на судскиот систем само го потврди она што постојано го кажувале – дека Арбен Таравари е слуга на овој заробен систем кој работи против Албанците и против Алијансата за Албанците.
„Водевме судска битка убедени во нашите статутарни и законски права, но секогаш свесни дека се соочуваме со систем и важен слуга на овој систем. Како поинаку може да се објасни фактот дека овој процес траеше повеќе од две години, фактот дека предметот беше вратен двапати по ред и беше разгледуван трипати во основниот суд, преседан што никогаш порано не се случил. Како поинаку може да се објасни фактот дека Тетовскиот суд оди против сопствената одлука што ја донесе двапати по ред однапред и оваа одлука се менува токму сега кога Арбен Таравари денес нема ниту половина од членовите и делегатите што ги имаше на почетокот на процесот. Тој немаше ниту тогаш мнозинство, а денес нема ниту половина од малцинството што го имаше тогаш“, објави Села.
Во последен момент, додава лидерот на едното крило на АА, судијата во Основниот суд во Тетово беше сменет и од Албанец бил назначен Македонец, а бидејќи оваа работа оди кај судија Македонец, се знае кого имаат на нивна услуга.
„Сето ова докажува дека судската одлука е политичка, тоа е обид за атентат врз албанска политичка партија која со години беше главен фактор на политичката сцена во земјата и моќен бранител на албанската национална кауза.
Сега ќе следи последниот чекор од целото ова сценарио, како што предупреди вазалот на овој систем, ребрендирање и исчезнување на скапото и чисто име АЛИЈАНСА ЗА АЛБАНЦИТЕ. Ова е целта од првиот ден на ова сценарио.
Но, ние не се откажуваме! Алијансата за Албанците се активистите, членовите, вистинските борци на каузата, оние кои го зачувале националниот идеал и мисија од нејзиното основање. Денес сме уште помотивирани од кога било да ја продолжиме нашата битка, ЗА АЛБАНЦИТЕ и СО АЛБАНЦИТЕ. Ќе ја обжалиме оваа одлука до Апелациониот суд и ќе ја искористиме секоја можност да се бориме и да го зачуваме нашиот дом кој е основан и изграден со жртвување, но и со крвта, трудот и потта на основачите и активистите, сите оние Албанци со кои ги делиме истите идеали“, стои во соопштението од таборот на Села.
Оваа одлука доаѓа по долг период на раскол во партијата, кој се отвори пред парламентарните и претседателските избори во 2024 година, кога спорот околу изборниот настап ја подели Алијанса за Албанците на две спротивставени структури. Во февруари 2024, Централното собрание на партијата донесе иницијатива за разрешување на Таравари, додека неговото крило подоцна одржа и посебен вонреден конгрес за внатрешно консолидирање.