Иако вниманието на јавноста е насочено кон растот на цените на нафтата и проблемите во Ормускиот теснец, експертите предупредуваат дека се загрозени и бројни други сектори – од земјоделството до фармацијата и производството на чипови.
Ѓубривата под притисок и ризик за производството на храна
Еден од најзагрозените сектори е производството на вештачки ѓубрива. Околу една третина од светската трговија со ѓубрива поминува низ Ормускиот теснец, а цените на клучните компоненти како сулфур, уреа и фосфати веќе пораснаа за 30 до 40 проценти од почетокот на конфликтот.
Експертите предупредуваат дека продолжувањето на конфликтот би можело сериозно да го загрози глобалното производство на храна, бидејќи половина од светските посеви зависат од овие средства.
Алуминиумот на раб на недостиг
Нападите врз клучните топилници во регионот на Заливот дополнително го потресоа пазарот на алуминиум. Овој метал, кој сè почесто се нарекува „нова нафта“, би можел да достигне рекордни цени.
Регионот на Заливот произведува околу 10 проценти од светскиот алуминиум, а прекините во производството и транспортот веќе предизвикаа паника на пазарот, особено во автомобилската индустрија која забрзано создава залихи.
Пластиката сè поскапа поради проблеми со нафта и гас
Кризата со енергенсите се прелева и врз индустријата за пластика. Блискиот Исток, кој доминира во извозот на полиетилен и други петрохемиски производи, се соочува со сериозни нарушувања.
Поради тоа, цените на пластиката нагло растат, а компаниите ширум светот бараат алтернативни добавувачи по значително повисоки цени.
Се заканува недостиг на лекови
Фармацевтската индустрија исто така ги чувствува последиците од кризата. Проблемите во транспортот и намалениот извоз од клучните производствени центри, како Индија, би можеле да доведат до недостиг на лекови.
Во некои земји веќе се предупредува дека може да дојде до недостиг на основни медикаменти, вклучувајќи лекови против болка и терапии за тешки болести.
Хелиумот како неочекуван проблем
Уште еден сектор погоден од кризата е производството на хелиум. Нападите врз клучни постројки во Катар прекинаа значителен дел од глобалното снабдување со овој гас.
Хелиумот е клучен за производство на чипови, оптички влакна и медицинска опрема како апарати за магнетна резонанца, па неговиот недостиг може да има широки последици врз технологијата и здравството.
Ефектите од војната ги надминуваат границите на регионот
Експертите предупредуваат дека продолжувањето на конфликтот може дополнително да ја влоши состојбата и да предизвика верижни нарушувања во глобалната економија.
Иако првите ефекти се видливи преку растот на цените на енергенсите, вистинскиот удар врз пазарот би можел допрва да се почувствува преку недостиг и поскапување на производите кои се дел од секојдневната потрошувачка.