„Среде криза, додека македонските семејствата влегуваат во велигденските празници со празни фрижидери и полупразни трпези, Мицкоски организира раскошни гозби на сметка на народот. Граѓаните едвај врзуваат крај со крај, не знаат дали ќе имаат за леб, како да го поминат месецот, а Мицкоски како Луј XIV -ти, со владините функционери уживаат во раскошни гозби во скапи хотели“, велат од СДСМ за вчерашниот ручек по повод претстојниот верски празник Велигден во хотелот „Хилтон“.
Од СДСМ велат дека нема пари за 600 евра минимална плата за работниците, нема пари за мерки за помош на ранливите граѓаните, само кога е Мицкоски и неговиот луксуз во прашање има пари.
„Ова не ароганција – ова е навреда за секој граѓанин. Луксузирање на грбот на народот, папаја, манго, авион, гозби во скапи хотели. Човек кој носи часовник од 60.000 евра, очигледно одамна го изгубил контактот со реалноста во која живее народот. Не знае што значи празен фрижидер. Не знае што значи да немаш за леб. Оваа власт не чувствува, не разбира и не се грижи за народот. Власта мисли само на себе. Се најаде ли Мицкоски? Колку им е доволно на функционерите од ВМРО-ОКГ? До кога ќе го понижуваат народот“, прашуваат од најголемата опозициска партија.
Премиерот Мицкоски вчера во хотелот „Хилтон“ во Скопје организираше „посен велигденски ручек“ на кој ги повика политичките и верските лидери, соработниците и новинарите. Од фотографиите може да се забележи дека на масата покрај премиерот седат претседателката Сиљановска-Давкова, претседателот на Собранието Африм Гаши, поглаварот на МПЦ-ОА, г.г. Стефан и поглаварот на ИВЗ, Шаќир Фетаи. Меѓу другите присутни, можат да се забележат претседателот на Уставниот суд, Дарко Костадиновски и гувернерот на Народната банка, Трајко Славески.