Украина и Русија се движат кон потенцијален договор за завршување на војната, објави во петокот „Блумберг њуз“, повикувајќи се на шефот на Кабинетот на украинскиот претседател Володимир Зеленски.
Кирил Буданов, поранешен шеф на украинската воена разузнавачка служба, порачал дека гледа напредок кон договор, но одбил да каже како би изгледал евентуалниот компромис за територијата, што е клучен камен на сопнување во преговорите.
„Досега не е донесена конечна одлука“, рекол тој, стои во текстот. „Но, во принцип, сите сега јасно ги разбираат границите на она што е прифатливо. Ова е огромен напредок“.
„Сите тие разбираат дека војната мора да заврши. Затоа преговараат“, рекол Буданов во интервју за „Блумберг“ на 4 април. „Не мислам дека ќе трае“.
Буданов беше назначен за шеф на Кабинетот на Зеленски во јануари и стана клучен претставник на Украина во преговорите меѓу Киев и Москва, посредувани од САД.
Единствениот опиплив резултат од неколкуте рунди преговори оваа година беше размена на воени заробеници. Во најновиот случај во март, Украина и Русија разменија 500 затвореници.
Украинските власти соопштија дека е можна уште една размена пред Велигден овој викенд.
Русија објави 32-часовен прекин на огнот во текот на два дена за време на Велигден, а Украина се согласи да возврати. Кремљ соопшти дека прекинот на огнот ќе биде на сила од 15 часот во сабота до 23 часот во недела.
Буданов додал дека Киев и Москва во моментов се држат до своите „максималистички“ позиции во преговорите, но дека верува дека позициите би можеле да се приближат во потрагата по компромис.
Русија бара Украина да се повлече од деловите на Донбас што Киев сè уште ги контролира, што Украина одбива да го стори.
Зеленски нагласи дека со оглед на прекинот на огнот меѓу САД и Иран на Блискиот Исток, трилатералните состаноци наскоро би можеле да продолжат за мировни преговори.