Советот за безбедност на ОН едногласно усвои резолуција, барајќи да се обезбеди заштита на новинарите во земјите,како и оние изложени на напади во конфликти во различни делови на светот, но и да бидат ослободени киднапираните и заробени новинари, пренесоа агенциите и ДПА.
Независните медиуми се меѓу основните фактори за создавање на демократски општества и затоа владите треба да сторат сè што е потребно за осигурување на безбедноста и ослободувањето на новинарите, вклучувајќи и во конфликтните зони, нагласува во документот.
Резолуцијата за прв пат ја признава улогата што новинарите можат да ја играат за заштита на цивилите и спречување на конфликти преку обезбедување на рано предупредување за кризи, кои можат да доведат до “геноцид, воени злосторства, етничко чистење и злосторства против човештвото”.
Документот изразува длабока загриженост од зголемувањето на закани од терористички групи за безбедноста на новинарите, медиумските професионалци и вработени поврзани со медиумите . Тој исто така бара мировните мисии на ОН да обезбедат редовни извештаи за безбедноста на новинарите.