Компанијата Макстил испрати соопштение во кое информира дека не започнале со планираното производство на челичен полуфабрикат, поради тоа што РЖ Услуги не им пуштил вода.
По завршувањето на обемниот инвестиционен зафат на темелната реконструкција на електролачната печка во производниот погон челичарница, заради подобрување на нејзината енергетска ефикасност, за 14 јули беше најавено рестартирање на производството на челичен полуфабрикат.
Од страна на снабдувачот со технолошка вода РЖ Услуги системот за рециркулација на меката вода не беше ставен во функција, при што без никакви претходни најави беа наметнати побарувања за повеќе од двојно зголемување на цената на услугата за дистрибуција на водата и беа одбиени сите обиди за решавање на настанатиот проблем со вообичаената пракса, стои во соопштението на Макстил.