По околу 3000 имигранти се очекува да влегуваат секојдневно во Македонија во наредните месеци, а повеќето од нив ќе бидат бегалци, главно од Сирија. Ова станува јасно од изјавата на портпаролот на Високиот комесаријат за бегалци на ОН Мелиса Флеминг.
Имигрантите пристигнуваат на големи групи од по 300 до 400 лица и се придвижуваат со возови и автобуси до Србија.
Не се очекува приливот на луѓе да се намали во следните месеци, бидејќи времето е убаво и луѓето ќе продолжат да го преминуваат Медитеранот, наведува таа.
Во меѓувреме, бугарското Министерство за внатрешни работи соопшти дека испраќа војници на бугарската армија кои ќе и помагаат на граничната полиција и до колку е потребно тој број перманентно ќе се засилува.Истовремено пограничните полициски хеликоптери спроведуваат летови над бугарско-македонската граница и над делови од границата со Грција, откако Грција, Македонија, Србија и Унгарија се соочија со прилив на бегалци од Сирија, Авганистан и други земји од Блискиот Исток, чија цел е да отпатуваат во побогатите земји на ЕУ.
И самата Бугарија се соочува со пораст на бројот на бегалците што во неа доаѓаат од Турција, а во изминатите две години 25.000 луѓе аплицирале за азил, според официјалните податоци. Како одговор на тоа, земјата ја зајакна својата гранична полиција, инсталира камери и сензори на движење, и ја продолжува безбедносната ограда што ќе покрие 160 километри од границата со Турција.