„Домовите се распаѓаат исто како и системот во државата, но ние сè уште немаме добиено нов специјален студентски дом за да се спасат студентите живи од бедата во која живеат и која се руши околу нив“, пишува Студентски пленум на својата Фејсбук страница.
„Ова е блокот Б во студентскиот дом “Гоце Делчев”, во кој пред некој ден како што може да се види на сликите се срушил дел од кровот во еден од ходниците.
Овојпат немало повредени. Дали и наредниот пат нашите колеги ќе бидат еднакво среќни или пак до тогаш ќе добијат нов (специјален) студентски дом?
По ова реагираа од студенсткиот дом Гоце Делчев. Велат дека за овој настан имало индиции дека штетата е намерно предизвикана, односно се работело за свесно и намерно уништување на инвентарот.
– Дополнително би сакале да информираме дека поради дотраеноста на студентскиот дом „Гоце Делчев“, изграден пред повеќе од 4 децении, а во насока на унапредување на студентскиот стандард и капацитетите за сместување на студентите, започна процесот на темелна реконструкција на сите објектите во состав на овој дом, со средства обезбедени од страна на Владата на Република Македонија и Министерството за образование и наука – се наведува во соопштението на домот.
Реконструкцијата се реализирала етапно, во неколку фази и согласно предвидената динамика во акцискиот план, а се очекува да биде завршена во текот на 2017 година.
Премиерот Никола Груевски во интервју за една од националните телевизии уште во март 2014 изјави дека домот во најбрз можен рок целосно ќе се реконструира.