Блокадите на границата со Грција влијаат врз забавување на превозните операции на транспортерите. Ако поради близината со оваа земја, транспортерите оделе и се враќале за еден ден, со блокадите, превозот се пролонгира за еден ден.
– Со кој било застој, се зголемуваат трошоците, имаме помал обрт во работата и еден превоз помалку – изјави Билјана Муратовска од Здружението на превозници „Макам-транс“.
На грчко-македонската граница, на преминот Богородица остануваат повеќе од 180 трактори кои вршат повремени блокади и стопирање на работа на границата. Според информациите во Грција, можно е денеска да нема двократни блокади од 12 до 14 и од 18 до 21 часот бидејќи земјоделците и од овој дел ќе бидат на протестот во Солун.
Меѓутоа, не е исклучено дел од нив да останат и да продолжат со блокадите. Блок има и на преминот Дојран – Дојрани, каде се поставени дел од вкупно 450 трактори, кои се наоѓаат во областа околу Кукуш.
Блокади има на многу места и околу влезот на Солун, вклучувајќи го и патот кон аеродромот и кон Халкидики.