Како што беше најавено германската канцеларка Ангела Меркел го испрати својот државен министер, надлежен за Европа, во Министерството за надворешни работи на Германија, Михаел Рот денеска и утре да истражи и види со директни средби што се случува со Македонија.
– Тој главно треба да се информира за внатрешнополитичката состојба, за блокираноста на процесот и најавените избори, како и за бегалската проблематика. Предвидени се разговори со претставници на Владата и опозицијата, граѓанското општество и невладини организации, кои се активни во областа на човековите права, поддршката за бегалците, Ромската популација и ЛГБТИ-заедницата во Македонија, соопшти Германската амбасада во Скопје.
Предвидено е државниот министер Рот да учествува и на јавна дебата со студенти од Универзитетот „Св. Кирил и Методиј“ Скопје.