Од сезоната 2016/2017 нов член на македонскиот ракометен шампион Вардар ќе биде шпанскиот репрезентативец Жоан Кањелас. Договорот со 29-годишниот бек е со важност од три сезони.

Тој ќе биде четвртиот Шпанец во Вардар, по Арпад Штербик, Хорхе Македа и Алекс Душебаев кои сега се дел од тимот, заедно со тренерот Раул Гонзалез и неговиот асистент Давид Дејвис Камара.

Кањелас викендов беше во Скопје каде имаше можност да се запознае одлиску со „црвено-црните“ и со условите што ќе ги има, и да го гледа натпреварот од женската Лига на шампионите меѓу Вардар и Савехоф.

Кањелас има искуство во играње во најдобрите европски лиги, во Шпанија и во Германија. Од 2013 година настапува во Бундеслигата, во екипите на Хамбург и Кил. Зад себе има настапи и во финалето на ЛШ, освојувач на Супер Глоуб, медали со репрезентацијата на Шпанија на СП и ЕП. Последниот успех му е сребрениот медал на ЕП 2016 година во Полска.

Американци го купуваат Евертон за 200 милиони фунти

– Вардар продолжува со создавањето на респектабилен тим, и од следната натпреварувачка сезона ќе добие уште едно звучно и квалитетно ракометно име. Шпанскиот репрезентативец Жоан Кањелас во следните три сезони ќе биде дел од нашиот клуб. Верувам дека со неговото искуство ќе донесе дополнителен квалитет во играта што ќе ни овозможи да бидеме уште подобри како тим. Неговите индивидуални квалитети се добра референца за нашите очекувања во следниот период. Се надевам дека заедно ќе бидеме уште поуспешни, вели Давор Стојаноски, извршниот директор на Вардар./MИА