Во Македонија лани имало 70.139 активни деловни субјекти од кои најголемиот дел, 80,2 проценти имале по еден до девет вработени.
Според податоците на Државниот завод за статистика, најголемо учество во структурата имаат секторите: Трговија на големо и трговија на мало; поправка на моторни возила и мотоцикли со 23.843 субјекти или 34 отсто и Преработувачка индустрија со 7.639 субјекти или 10,9 проценти.
Најмала застапеност имаат секторите: Рударство и вадење камен со 173 субјекти или 0,2 отсто и Снабдување со електрична енергија, гас, пареа и климатизација со 160 субјекти или 0,2 процента.
Според бројот на вработени, најголемо учество од 80,2 отсто имаат деловните субјекти со 1 до 9 вработени. Потоа следат деловните субјекти без вработени или субјекти со неутврден број на вработени (без податок за вработени) со 10,4 отсто, па субјектите со 10-19 вработени со 4,3 отсто, субјектите со 20-49 вработени чие учество изнесува 2,8 отсто, со 1,9 проценти учествуваат субјектите со 50-249 вработени и само 0,3 проценти од активните деловни субјекти имаат над 250 вработени./МИА