Претседателот на ВМРО-ДПМНЕ, Никола Груевски, на прес-конференција во партиското седиште во Скопје, рече дека од скоро 89 отсто обработени гласови, ВМРО-ДПМНЕ освоиле 434 илјади гласови, додека СДСМ освоил 415 илјади. Со тоа ВМРО-ДПМНЕ е победник на овие избори, рече тој.
„Денес победи коалицијата предводена од ВМРО-ДПМНЕ, но победи и Република Македонија“, рече тој прогласувајќи ја десетата победа на ВМРО-ДПМНЕ.
Тој рече дека ВМРО-ДПМНЕ и коалицијата секогаш ќе бидат со народот.
„Како и да се свртат работите, што и да се случува, ова го кажуваме и пред, а сакам да го кажеме и после избори, дека ВМРО-ДПМНЕ секогаш била и секогаш ќе остане на линијата на државните и национални интереси на Република Македонија и во корист на народот, на граѓаните на Република Македонија“, рече вечерва Груевски.
https://www.facebook.com/RSEMK/videos/10154416408873725/
Тој рече дека оваа победа има посебна тежина, особено кога ќе се погледне низ што сè помина партијата и државата во изминативе две и пол години. Според Груевски, ВМРО-ДПМНЕ ја има константната поддршка од граѓаните, додека СДСМ добил значителна поддршка кај албанскиот електорат.