Од Министерството за култура со писмено соопштение реагираат по изјавата на Роберт Алаѓозовски од СДСМ, министерката Канчевска Милевска да не уништува архивски материјали.
„Информираме дека Министерството за култура ќе поднесе кривична пријава и тужба за граѓанска одговорност против Роберт Алаѓозовски кој на денешната прес-конференција изнесе бројни лаги и невистини и го наруши угледот на самата институција.
Дописот кој Алаѓозовски го презентираше во јавноста, кој патем е незаконски стекнат, претставува законска обврска на Секторот за општи работи при комуникацијата со останатите сектори во Министерството, предвидена согласно Законот за архивски материјал, Уредбата за канцелариско и архивско работење и Упатството за начинот и техниката на постапување со архивскиот и документираниот материјал во канцелариското и архивското работење.
За оваа изнесена лага и невистина, покрај кривичната пријава и тужбата од страна на Министерсвото за култура, соодветна тужба ќе поднесе и лично министерот за култура“ стои во соопштението од Министерството.