Англија ја испушти победата против Италија синоќа при спорни околности, но дуелот сигурно ќе биде запаметен од двајца апсолутни дебитанти.
Џејмс Тарковски играше цело време и беше вмешан во ситуацијата при пеналот, а Луис Кук се појави по паузата и токму во овој момент му донесе и 17.000 фунти на својот дедо.
Причината е дека во 2014-та тој се обложил дека внук му ќе го облече националниот тим пред да наполни 26 години. Коефициентот бил 33 наспроти 1, па за 500 фунти дедото на Кук прибрал солидна сума.
Засега не е јасно колку добри се шансите на Луис да патува за светското првенство, но сигурно ќе остане во сметките на Герет Саутгејт, откако минатата година помогна на Англија да ја освои светската титула до 20 години, а дури беше и капитен на тимот.