Програмата на Танц Фест во Годината на танцот 2018 ќе почне на 04 април во МНТ со пред отворање на музика на „Крафтверк“ и учество на деведесет деца од танцовите студија „Break The Floor“, настапот на прекрасната словенечка танчерка Росана Хрибар, во соло танцот „Орландина“ на Танцовиот театар од Љубљана, Словенија, во кореографија и режија на Рисима Рисимкин, и со претставата „Д.О.Л.“ на младата кореографка Адријана Данчевска.
„Адријана Данчевска е дел од новата генерација млади кореографи, кои се произведени во Македонија во Скопје танцовата академија, сега Катедра за танц при УГД. Мислам дека е исклучително талентирана и дека направи ново, атрактивно и предизвикувачко дело – кореографија која ги буди инстинктите и овозможува комплетно доживување. Навистина се чувствувам гордо што Скопје танцовиот театар го слави седмиот роденден со оваа кореографија, во која учествуваат квалитетни млади уметници и која ќе има свој понатамошен творечки пат, не само во Македонија, туку и надвор“, потенцира Рисима Рисимкин.