Попладнево во Собрание премиерот Зоран Заев, министерот за надворешни работи, Никола Димитров и министерката за правда, Рената Дескоска ќе се сретнат со осумтемина опозициски пратеници за консултација за уставните амандмани, потврдува за ТВ 24 висок владин функционер.
Според истиот извор, владината тројка и осумтемината пратеници ќе се координираат околу условите кои ги поставија пратениците за да гласаат за отворање на Уставот. Тие бараат амандмански да се зајакне заштитата на идентитетот, македонскиот јазик, како и употребата на терминот Северна Македонија за внатрешна употреба да биде врзано за членството во ЕУ.
Се очекува да се разговара и за таканареченото тело за помирување за настаните од 27 април. Според извори од пратеничката група на опозициските пратеници, тие на премиерот Заев и на министрите ќе им ги претстават конкретно нивните предлози на хартија, а очекувањата се да присуствуваат и тројцата обвинети пратеници за крвавиот четврток, иако во Кривичниот суд денеска има ново рочиште за 27 април./24 Вести