Малезија ќе врати 3.000 тони пластичен отпад на земјите од кои е донесен, за да не се претвори во депонија за богатите земји, соопштија светските агенции, цитирајќи ја министерката за животна средина, г-ѓа Ео Би Јин.
Меѓу овие земји се САД, Канада, Обединетото Кралство и Австралија, објави Асошиејтед прес. Минатата година Малезија стана водечка дестинација за пластичен отпад, откако Кина забрани увоз на таков вид ѓубре. Годишниот проток на овој вид отпад изнесува 7 милиони тони, објави Ројтерс.
Во Малезија се градат десетици фабрики за рециклирање, од кои многумина работат без дозволи, а јавноста се жали на проблеми за животната средина.
Ео Би Јин рече дека 60 контејнери со ѓубре увезени нелегално, ќе бидат вратени во земјите на потекло, а трошоците по враќањето ќе бидат преземени од овие земји. Десет од контејнерите треба да бидат вратени назад до две недели, рече министерката, откако ја покажа на новинарите содржината на ѓубре на пристаниште надвор од Куала Лумпур.
Меѓу отпадот има кабли од Велика Британија, заразени кутии млеко од Австралија и ЦД од Бангладеш, како и многу електроника и домашен отпад од САД, Канада, Јапонија, Саудиска Арабија и Кина.
Според Ео Би Јин, отпадот од Кина, се чини, е собран првично во Франција и други земји и испратен во Кина, но по воведувањето на забраната е пренасочен. Ео Би Јин даде пример со британска компанија за рециклирање, која извезе 55.000 тони пластичен отпад во околу 1.000 контејнери во Малезија во последните две години.
„Малезија нема да биде контејнер на светот. Иако сме мала земја, не може да бидеме притиснати од развиените земји“, додаде таа.