167
Романскиот претседател Клаус Јоханис вчера го поддржа свикувањето предвремени избори во земјата, пренесе агенцијата Аџерпрес.
„Романците сакаат Социјалдемократската партија (СДП) да се повлече од власта. Треба да бидеме реални. Ние (Национално-либералната партија) ги освоивме изборите за Европскиот парламент, јас победив на претседателските избори, но во парламентот остануваат истите пратеници, кои беа избрани во 2016 година. СДП има многу пратеници и не сака да ја предаде власта“, рече Јоханис.
Во ситуација кога Романците сакаат промени и тоа го покажаа на сите избори, природно е да се свикаат парламентарни избори колку што е можно поскоро, рече Јоханис.
Според претседателот, предвремените избори нема да доведат до политичка криза или да ја усложнат ситуацијата во земјата.
Јоханис во ноември 2019 година го освои својот втор претседателски мандат, како кандидат на Национално-либералната партија.
Претходно премиерот Лудовик Орбан соопшти дека предвремените парламентарни избори можат да бидат организирани истовремено со локалните избори во текот на летото.
Редовните парламентарни избори треба да се оддржат на крајот на оваа година, а локалните избори се очекува да бидат во јуни.