Средбата во Кремљ меѓу рускиот и турскиот претседател Владимир Путин и Реџеп Таип Ердоган за ситуацијата во Идлиб се најде во фокусот на голем број западни медиуми, коментира РИА Новости. Многу странски новинари заклучија дека Москва добила повеќе од Анкара.
Според германскиот „Дојчландфунк“, руската страна на крајот постигнала сè што сакала.
„Турската страна ја задржува контролата врз дел од регионот; руската воена полиција создава тампон зона. Ова е сценарио засновано на договорот пред една и пол година во Сочи, а тој е целосно во интерес на Русите. Москва го добива она што го сака“, коментира германски експерт.
Според него, од 2015 година Русија методично ги остварува своите цели во Сирија.
Русија е посилна и веројатно поумна од Турција и подобро се справува со ситуацијата, се вели во коментарот.
Според авторот на материјалот, Москва е во поповолна позиција од Анкара во врска со конфликтот во Сирија. Во исто време, напредокот во преговорите покажа дека руските методи за влијание врз ситуацијата не биле неограничени.
Француски „Ле Монд“ вели дека прекинот на огнот во Идлиб, договорен меѓу руските и турските лидери, може да се смета за неуспех на Анкара.
„Договорот е пораз за претседателот Ердоган затоа што не ги зема предвид неговите основни барања“, пишува весникот. Документот не кажува ништо за турските надзорни пунктови опкружени со режимот на Асад и бегалците кои се појавија по почетокот на борбите.
На крајот, Дамаск ги остава окупираните територии за себе, иако Анкара бараше повлекување на сириските сили, се вели во статијата.
Подвлечено е дека во Русија нема чувство за триумф, иако Путин успеал да ги оствари своите главни цели.
Експертите стравуваат дека постигнатиот договор меѓу двајцата лидери ќе биде доста нестабилен.
Списанието „Национален интерес“ коментира дека договорот меѓу Путин и Ердоган е во целосна спротивност со барањата направени од американскиот државен секретар Мајк Помпео. Авторот го опишува како „неуспех на турскиот гамбит“ на Вашингтон.
„Овој договор става крај на повторниот обид на Помпео да склучи американско-турски сојуз против Асад, кој е поддржан од Иран и Русија“, се наведува во написот.
Помпео го повика Асад да се врати на линијата за прекин на огнот што функционира во северо-источна Сирија од 2018 година. Само неколку часа подоцна, сепак, рускиот и турскиот претседател го склучија договорот со кој се конкретизира освојувањето од сириските трупи по 2018 година, соопштија експертите.