Во Њујорк починаа 630 луѓе од коронавирус во изминативе 24 часа, што е за 24 повеќе од четвртокот, според гувернерот на државата Ендру Куомо.
Тој рече дека 17.316 се хоспитализирани, што е мало намалување од претходниот ден кога имало 17.735, но дека ова е сепак голем број, пренесува Ројтерс.
Куомо рече дека му е потребна федерална помош за засилување на тестирањето на коронавирусот и рестартирање на економијата.
Одговарајќи на критиките на претседателот Доналд Трамп за барањата за федерална помош, тој рече дека доколку Трамп седи дома и гледа телевизија, можеби треба да стане и да почне да работи.
Куомо рече дека Трамп повеќе пати одбивал да им помогне на државите во однос на тестирањето затоа што, како што наведе тој, било премногу тешко и комплицирано.