Адвокатот на Љупчо Палевски, Јовица Страшевски денеска изјави дека „како што почна, така и заврши целиот циркуз“. Вели дека Обвинителството без ниту една доказ и Судот врз основа на напишаното во обвинителниот акт, го соопшти денешното прочитано. Најави жалба на денешната пресуда.
-Гледате дека без ниту еден доказ, самото Обвинителството го стави целиот акцент на таткото. Тој доби заслужена ослободителна пресуда, а истото требаше да биде и за мојот клиент. Моето мислење е дека не се ценети ниту еден доказ на одбраната, иако беа доста. Судот нема направено оценка на сите докази. Оваа пресуда не е издржана. Продолжува циркузот без ниту еден доказ, кажа Страшевски во изјава за медиумите.
Кривичниот суд во Скопје денеска изрече доживотна казна затвор за Палевски, Велибор Манев, Влатко Кешишев и Боре Видевски за грабнувањето и убиствата на 14-годишната Вања Ѓорчевска и 74-годишниот Панче Жежовски, извршени во ноември 2023-та година.
Петтообвинетиот, Александар Ѓорчевски – татко на Вања, е ослободен од обвинението.
Судскиот процес траеше 10 месеци со речиси 40 рочишта. Обвинителството побара максимални казни за обвинетите, посочувајќи дека нема олеснителни околности, а делото, особено убиството на дете, не смее да се толерира.