Аргентинскиот фудбалски репрезентативец и напаѓач на Барселона во средата на прес-конференција објави дека е принуден да ја заврши својата играчка кариера поради проблеми со срцето.
„Оваа прес-конференција беше свикана за да ви соопштам дека ставам крај на мојата играчка кариера. Ова е тежок момент, но се помирив со одлуката што ја донесов“, изјави во солзи 33-годишниот фудбалер кој во својата 18-годишна кариера постигна повеќе од 400 голови, пренесе „Хина“.
Агуеро заврши во болница на 30 октомври откако доживеа болка во градите и отежнато дишење за време на неговиот настап за Барселона на првенствениот натпревар против Алавес. Клубот по претресот објави дека Агуеро ќе отсуствува од терените најмалку три месеци.
„Ова е одлука што ја донесов за да го зачувам моето здравје. Лекарите ме советуваа да престанам да играм. Одлуката ја донесов пред десетина дена“, изјави Агуеро, кој во летниот преоден рок пристигна во Барселона од Манчестер Сити, но поради повреда на мускулот и проблеми со срцето настапи само на пет настапи за каталонскиот клуб и постигна еден гол.
„Многу сум горд на мојата кариера бидејќи ги остварив моите соништа. Само сакав да станам професионален фудбалер и никогаш не мислев дека ќе играм во Европа“, изјави Агуеро, кој помина една деценија во дресот на Манчестер Сити пред да се врати во шпанската Ла Лига, со кој освои пет титули во Англија, еден ФА Куп, а шест пати триумфираше во Лига купот и со 260 гола на 390 настапи стана најдобар стрелец во историјата на клубот.
Пред да дојде во Манчестер Сити, Агуеро играше четири сезони во аргентинскиот Индепентиенте (2002-2006) и уште четири во Атлетико Мадрид (2006-2010), со кого ја освои Лигата на Европа во 2010 година.
За сениорската аргентинска репрезентација забележа 101 настап и постигна 41 гол. Беше дел од репрезентацијата која беше поразена во финалето на Светското првенство во Бразил од Германија во 2014 година, а годинава ја освои титулата шампион на Јужна Америка.
Со младата репрезентација стигна до олимпиското злато во Пекинг во 2008 година, а во полуфиналната победа (3-0) против Бразил, постигна два гола.