Претседателот на ДУИ Али Ахмети остварил средба со евроамбасадорот во Скопје Аиво Орав по која истакна дека почетокот на политичкиот дијалог во Брисел треба да се зајакне и унапреди што е можно поскоро за да се надмине политичката криза. Според партиското соопштението тој порачал и дека Европската комисија треба директно да се вклучи со однапред одредена агенда за инволвираните страни, но и да го следи судскиот процес кој ќе обезбеди кредибилитет и доверливост на сите страни.
Според Ахмети, и Вашингтон може да има конструктивна улога во охрабрувањето на страните со цел да се надмине политичката криза. Ахмети и Орав разговарале за политичката ситуација во Македонија, политичкиот дијалог, меѓуетничките односи, како и интеграцијата на земјата во ЕУ.
Според него, политичката криза влијае на очекувањата на граѓаните кои сакаат стабилна, безбедна Македонија, интегрирана во НАТО и која ќе ги започне преговорите за членство во ЕУ, со добри меѓуетнички односи и добрососедство, како и оптимални услови за одржлив економски развој.
Ахмети рекол дека политичките партии треба да сторат сè што можат за да се фокусираат на остварување на очекувањата на граѓаните, но и да покажат подготвеност за да се осигураат стабилноста и демократскиот капацитет на националните институции за да се справат со политичка криза.