Светската трговска организација (СТО) објави дека воведените царини од страна на американскиот претседател Доналд Трамп, ќе предизвикаат сериозен пресврт во меѓународната трговија и ќе имаат особено негативно влијание врз САД. Во најновиот извештај за глобалните трговски трендови, СТО наведува дека првично се очекувало трговијата со стоки да порасне за 2,7 отсто во 2025 година. Сепак, поради новите трговски политики, сега се предвидува пад од 0,2 отсто.
„Посебно сме загрижени поради раздвојувањето меѓу САД и Кина. Тоа е феномен што навистина не вознемирува“, изјави генералната директорка на СТО, Нгози Оконџо-Ивеала.
Таа нагласи дека трговијата меѓу двата геополитички ривали би можела да се намали меѓу 8 и 11 отсто, вклучително и во секторот на технолошки производи, како што се паметните телефони.
„Изгледите за глобалната трговија значително се влошија поради зголемените царини и неизвесноста во трговската политика. Претходната прогноза предвидуваше раст на глобалниот БДП од 2,8 отсто во 2025 година, но сега се очекува послаб раст од 2,2 отсто“, се наведува во извештајот.
СТО предвидува и одредено пренасочување на трговијата, бидејќи Кина бара нови пазари за своите производи надвор од САД. Очекувањата се дека кинескиот извоз во региони надвор од Северна Америка ќе порасне меѓу 4 и 9 проценти во 2025 година.
„Падот на трговијата ќе биде особено изразен во Северна Америка, дури и без примената на најстрогите царини“, се наведува во извештајот објавен на Глобалниот трговски форум. Според проценките, оваа година извозот ќе се намали за 12,6 отсто, а увозот за 9,6 отсто.