„Поминав една војна, онаа Втората светска… Го искусив татнежот и плачот на земјотресот… Видов разни страдања, искушенија, поединечни и заеднички… Но, ова не сакам на зајдисонцето од својот живот пасивно да го гледам… Не сакам да гледам уште една војна со невидливото. Не сакам да гледам тажни, изолирани луѓе кои мораат да заминат од овој свет сами, без своите околу нив…“, напиша на социјалните мрежи, актерката Милица Стојанова, која се вакцинираше против коронавирус и им порача на граѓаните да бидат одговорни со цел да се стави крај на епидемијата.
„Светот мора да го одблокираме. Мораме повторно да бидеме заедно и спремни да создаваме нови убави нешта. Јас сакам се’ уште да се радувам во заедница, а не да самувам. Затоа да бидеме одговорни и да се вакцинираме, оти не гледам друго чаре и за себе и за оние околу мене…“, објави таа.
Стојанова исто така упати апел да не бидеме себични.
„Конечно да покажеме разум и солидарност какви што покажуваат овие прекрасни здравствени работници кои денес беа со мене, а секојдневно се обидуваат да спасат стотици и илјадници животи. Да покажеме доблест барем кон нив. Да покажеме доблест кон животот и кон секој еден во заедницата, затоа што грижејќи се за себе се грижиме за другиот“, стои во објавата на Фејсбук на актерката.
Милица Стојанова е најпозната по својата улога во култниот македонски филм „Исправи се, Делфина“ од 1977 година. Таа исто така имаше улоги и во „Среќна Нова 49’“, „Тетовирање“, „Пред дождот“, „Збогур на 20. век“, „Прашина“, па се до краткиот филм „Види ја ти неа“.