Хезболах денеска за првпат од почетокот на војната лансираше ракета земја-воздух за да собори израелско беспилотно летало, пренесува „Ал Џезира“.
„Ова покажува дека Хезболах започнува нова фаза во предизвикувањето на израелската армија и интензивирање на конфликтот“, изјави воениот експерт Илија Магниер за „Ал Џезира“.
„Како одговор, Израел бомбардираше подлабоко во либанската територија за да го погоди изворот на лансирањето, бидејќи не може да дозволи да ги гаѓаат нивните ‘очи’ на небото (дроновите)“, рече тој.
Во изминатите три недели, судирите меѓу Израел и Хезболах останаа ограничени по обем и географска локација, главно фокусирани на изолирани области во близина на границата. Сепак, експертите велат дека двете страни сега ги прошируваат своите целни области.
Во неделата ракетите истрелани од Хезболах стигнаа до градот Кирјат Шмона на северот на земјата и погодија една куќа, јавуваат израелските медиуми.