По катастрофалната сезона во која Милан не успеа да се квалификува за Европа за прв пат по осум години, се случија големи промени во спортскиот сегмент на седумкратниот освојувач на Лигата на шампионите.
Милан има нов спортски директор. Станува збор за легендата на албанскиот фудбал, Игли Таре, кој беше голема желба на Златан Ибрахимовиќ во раководството на „росонерите“.
Игли Таре целата своја менаџерска кариера ја помина во Лацио, каде што беше спортски директор на клубот во последната деценија.
Албанскиот репрезентативец, кој одигра 68 натпревари за својата земја и ја заврши кариерата во 2008 година, утрово постигна конечен договор со претставници на Милан, поточно со извршниот директор Џорџо Фурлани.
Поранешниот менаџер на Лацио денес ќе потпише двегодишен договор, со можност за уште една година. Веста ја потврдија Матео Морето и Фабрицио Романо, а Таре ќе заработува 800.000 евра по сезона.
За време на неговата кариера како спортски директор, Таре знаеше како да најде врвни и евтини засилувања за Лацио, но беше критикуван за форсирање на своите сонародници во клубот, па затоа голем број албански фудбалери поминаа низ „Олимпико“ за време на неговиот мандат.
Милан, исто така, интензивно работи на доведување на тренер, а првата и главна опција е Винченцо Италијано, кој ѝ го донесе на Болоња првиот трофеј по 51 година чекање.
Овој 47-годишен експерт ги поместуваше границите каде и да работеше, особено во Специја, Фиорентина и Болоња.
Сепак, приказната со Италијано не е ни блиску доведена до крај како со Таре. Милан е на пат да го убеди Италијано да ја преземе клупата на „росонерите“ бидејќи веќе му е понуден нов договор во Болоња.