Двократниот светски шампион во Формула 1, Фернандо Алонсо, сака Меѓународната автомобилска федерација (ФИА) да „извлече поука“ од тешката несреќа на Мик Шумахер на Големата награда на Монако.
Возачот на Хаас изгуби контрола над својот болид во 26-иот круг од трката и удри во заштитните огради. По контактот, менувачот и целиот заден дел на Германецот се откачи од неговата шасија, што му се случи по втор пат од почетокот на годината.
Покрај Монако, несреќата на Шумахер на квалификациите за Големата награда на Саудиска Арабија во Џеда доведе до слична разделба.
По несреќата на Шумахер, трката за Големата награда на Монако беше стопирана со црвени знамиња околу 30 минути. За среќа, самиот пилот се спаси без никакви повреди.
„За среќа беше добро, но се надевам дека Формула 1 и ФИА ќе ги извлечат вистинските поуки. Според мене, автомобилот не се подели на два дела бидејќи нешто не беше во ред со него. Проблемот не е во самите автомобили, туку во нивната тежина. Тие се многу тешки, повеќе од 800 килограми. Инерцијата на секој удар е поголема од кога било досега. Се надевам дека ќе научиме нешто од овој инцидент“, рече Алонсо.