Администрацијата на американскиот претседател Џозеф Бајден, за време на разговорите со украинските власти, повтори дека не поддржува напади на руска територија, изјави портпаролот на Белата куќа за национална безбедност Џон Кирби.
„Уште еднаш, јасно им ставивме до знаење на Украинците што мислиме за нападите врз Русија – не сакаме да ги охрабруваме или овозможиме, и не сакаме никакво американско оружје да се користи за напад на руска територија“, изјави Кирби за Си-Ен-Ен.
Тој додаде дека Вашингтон добил гаранции од Киев дека ќе ги почитува желбите на САД.
„Исто така, ние сме сосема јасни кога велиме дека сакаме Украина да може да се одбрани бидејќи е нападната. Тие имаат право да се борат. Сепак, ние отворено кажуваме дека не сакаме војната да ескалира, пустошењето и насилството веќе го погодија украинскиот народ“, додаде Кирби.
За време на разговорите со Украинците не беа споменати никакви „последици“ за Украина, истакна Кирби.
Коментарот на Кирби доаѓа откако американските медиуми објавија дека руски борци, кои се против Путин и се борат на страната на Украина, извршиле инвазија на руска територија во близина на Белгород, пренесува „Танјуг“.
Еден од руските државјани, Сем Кили, рече дека рацијата била извршена со американска опрема купена на отворен пазар. Кирби рече дека не може да го потврди тоа тврдење.