Администрацијата на Трамп го суспендираше учеството на американските научници во клучните проценки на ОН за климатските промени, изјавија два извори, запознаени за ова прашање.
Наредбата за прекин на работата влијае на членовите на персоналот на американската програма за истражување на глобалните промени и на Националната администрација за океани и атмосфера, кои работат со клучната работна група на Меѓувладиниот панел за климатски промени, објави Ројтерс.
Ова значи дека САД нема да присуствуваат на големиот пленарен состанок на Меѓувладиниот панел за климатски промени (IPCC) во Хангжу, Кина, следната недела за планирање на седмата глобална проценка на климата, рече еден од изворите.
Белата куќа одби да ги коментира наодите, а Стејт департментот не одговори на барањето за коментар.
„Моќта на IPCC е во тоа што владите, бизнисите и глобалните институции можат да работат врз основа на споделени заклучоци. Тоа што САД се целосно отстранети од тој процес е загрижувачко“, рече Делта Мернер од Унијата на загрижени научници.
Додека американските научници ќе бидат присутни и ќе продолжат да работат на климатските истражувања што ги користи IPCC, ќе се почувствува отсуството на САД од процесот на IPCC, соопшти агенцијата.
Состанокот во Хангжу од 24 до 28 февруари се очекува да донесе неколку клучни одлуки кои ќе ги обликуваат резултатите од следните климатски проценки, вклучително и за улогата на секвестрацијата на јаглеродот и технологијата за зафаќање на CO2 од индустриските емисии или од атмосферата и складирање за да се намали влијанието врз климатските промени.
Кинеското Министерство за надворешни работи вчера соопшти дека не знаело за повлекување на американските учесници, пренесува Танјуг.