Европските лидери мора да дејствуваат решително за да избегнат да бидат видени од Вашингтон и Москва како „рамнодушни или апатични“ во разговорите за војната во Украина, предупреди пензиониран американски воен офицер. Во разговор за „Киев пост“, тој истакнал дека договор што ја наградува руската агресија би бил само „неправедно привремено примирје“, а не вистински мир.
Предупредувањето од полковникот Ричард Вилијамс, ветеран од НАТО, доаѓа во време кога група од седум европски лидери, вклучувајќи претставници на Франција, Обединетото Кралство и Германија, ги доставија своите мировни предлози до САД. Со тоа, тие се обидуваат да влијаат на агендата на претстојниот состанок меѓу американскиот претседател Доналд Трамп и рускиот претседател Владимир Путин, закажан за 15 август во Алјаска.
Полковникот Вилијамс бил особено критичен кон идејата дека може да се постигне договор со прекројување на границите, можност што Трамп претходно ја спомена. Таквиот договор, тврди тој, би бил ништо повеќе од „крвава руска узурпација на земјата заради постигнување неправедно привремено примирје“. Тој го обвинил американскиот претседател дека со тој потег сака само „да ја добие Нобеловата награда за мир за џабе“.
Неговите коментари одразуваат широко распространета загриженост во Европа дека мировниот договор постигнат меѓу американските и руските лидери би можел да дојде на сметка на Украина. „Дали „деловната“ дипломатија на моќ на Трамп и Путин некогаш ќе го привлече зајакот на правдата за да го изненади Зеленски и да ги поништи трите години брутални криминални убиства?“, прашал тој.
Тој, исто така, поставил директно прашање до европските лидери: „Дали Европа и НАТО повторно ќе им дозволат на самопрогласените „големи момчиња“ да поделат голем дел од Европа пред нивните наведнати очи?“
Вилијамс додал дека „светот и искуството од 80 години покажаа што почнуваат да значат Хирошима и Нагасаки – молитвата за мир никогаш не беше доволна!“. Тој повикал на попроактивна улога за европската „Коалиција на волјата“, нагласувајќи дека Москва и Вашингтон ќе го сфатат „сè помалку“ како европска рамнодушност или апатија.
Во нивната заедничка изјава, европските лидери се чини дека дадоа јасен одговор. Потписниците, вклучувајќи ги францускиот претседател Емануел Макрон и британскиот премиер Кир Стармер, поставија јасни црвени линии. Иако ги поздравуваат дипломатските напори на Трамп, тие инсистираат дека секое решение мора да „ги заштити виталните безбедносни интереси на Украина и Европа“.
Клучно е што лидерите нагласија дека „патот кон мирот во Украина не може да се одреди без Украина“ и дека „меѓународните граници не смеат да се менуваат со сила“. Во изјавата се вели дека сегашната фронтова линија треба да биде „почетна точка за преговори“ и дека земјите ветија дека ќе продолжат со „значајна воена и финансиска поддршка за Украина“.
Заедничката изјава ја потпишаа и италијанскиот премиер Џорџа Мелони, германскиот канцелар Фридрих Мерц, полскиот премиер Доналд Туск, финскиот претседател Александар Стаб и претседателката на Европската комисија Урсула Фон дер Лајен, со што се испраќа сигнал за обединет европски фронт решен да биде активен учесник, а не пасивен набљудувач, во секој мировен процес.