Сер Џим Ратклиф наводно е загрижен дека Рубен Аморим би можел да го напушти Манчестер Јунајтед. Како што пишува британски „Сан“, Ратклиф е подготвен да му даде целосна поддршка на Аморим ова лето и да инвестира во оживување на Јунајтед, но шефот на ИНЕОС наводно се сомнева во посветеноста на Португалецот.
Аморим неодамна изјави дека можеби е подобро за неговиот тим да го загуби финалето на Лигата на Европа, кое се игра против Тотенхем во Билбао оваа недела, бидејќи верува дека сегашниот состав не е подготвен за Лигата на шампионите. Тренерот на Јунајтед, исто така, во еден момент наговести дека можеби ќе се повлече, иако пред натпреварот против Челзи рече дека нема да ја напушти клупата.
Според британските медиуми, Ратклиф е вознемирен од ваквите контрадикторни изјави и сака да се осигура дека Аморим ќе одработи уште две години од договорот. Манчестер Јунајтед моментално е на 16-то место во лигата и под водство на Аморим не успеа да постигне две последователни победи во лигата, што е една од најлошите сезони во историјата на клубот.
Освен фактот дека освојувањето на Лигата на Европа би им донело многу потребни финансиски средства, клубот се надева дека оваа титула барем донекаде би го избришала впечатокот за хаотична сезона. Јунајтед е заинтересиран за напаѓачот на Вулверхемптон, Матеус Куња, и за младиот Лиам Делап од Ипсвич, а се сврте и кон засилувања на голманските и дефанзивните позиции.
Натпреварот против Тотенхем е закажан за среда во Билбао. Спарси моментално се наоѓаат на 17-то место во Премиер лигата и, според многумина, имаа уште полоша сезона од Јунајтед.