Директорката на ИЈЗ, Марија Андоновска информираше за втор случај на морбили во Македонија оваа година. Првиот случај бил во месец јуни, потврден во Лабуништа, струшко и исто така се работело за невакцинирано дете.
За вториот случај, Андоновска вели дека на 3-ти септември од Инфективната клиника до ИЈЗ е препратено 12-годишно дете кое било суспектно на морбили, по што била потврдена болеста. Анализите се направени истиот ден и епидемиолошката анкета исто така е направена истиот ден.
-Детето веќе престојувало во подрачје во Нови Пазар, Србија каде што веќе има појава на позитивни случаи. Во семејството на детето има и други пет деца од кои 3 се целосно вакцинирани, а две воопшто не се. Одбиваат да бидат вакцинирани. Дадени се само препораки бидејќи по закон, не следува никаква изолација, рече Андоновска.
Директорката појасни дека според исказите, детето немало многу контакти и не посетувало настава во училиштето во село Долно Коњари, општина Петровец.
-Родителите велат дека детето откако се вратило од Нови пазар, не одело во училиште, ниту неговото братче кое не е вакцинирано. Според нив, контактите биле во кругот на семејството, додава Андоновска.
Според неа, нивната обврска сега е да дадат препораки за изолација. Останува на добра волја на семејството дали ќе бидат почитувани.