Лидерот на Достоинство, Стојанче Ангелов денеска во изјава информира дека има преговори во Владата за разрешување на статусот на бранителите од 2001 година и нивно обесштетување.
-Од страна на ВМРО-ДПМНЕ во Собранието беше предложен предлог-закон за измени и дополнување на постоечкиот Закон за бранители. За жал пратениците на СДСМ гласаа против и тој предлог-закон не помина. Меѓутоа истите барања ги имаме во една предлог-одлука од достинство што е доставена до Владата. После нашата најава дека размислуваме да ја напуштиме владината коалиција, премиерот имаше јавни настапи и кажа дека таа ќе биде сериозно разгледана. Имавме и широка коалициска средба, на која што учествуваа сите партнери во власта и добив перцепција дека Владата ќе донесе одлука. После долги години агонија на бранителите, течат преговорите и јас сум голем оптимист дека иницијативата за праведно обесштетување на воените инвалиди ќе биде решена и ќе се исправи неправдата. Доколку Владата ја отфрли иницијативата, ние ќе ја напуштиме Владата, рече Ангелов.
Тој додаде дека бројката на лицата кои би биле обесштетени не е поголема од 30 и дека станува збор за отприлика 15 семејства на загинати бранители.