Првиот човек на ДЗС, Стојанче Ангелов ги повтори прогнозите на УХМР од каде соопштуваат дека вечерва се очекуваат поројни дождови во североистичниот дел од Македонија – пред се Куманово и делумно Крива Паланка, а во текот на ноќта целиот источен дел на државата ќе биде исто така зафатен со дождови. Ангелов верува дека тоа ќе помогне со справување со пожарите кај Македонска Каменица и кај Берово.
Ангелов соопшти дека пред малку Словенија и Франција испратиле понуди за помош од тимови со по 50 пожарникари и специјални возила за гаснење пожари. Понудите се разгледуваат и дополнително ќе се одлучи како ќе се постапи.
Директорот на ДЗС ја демантира СДСМ и критиките дека изгорени се повеќе од 20% од вкупната површина на шуми и пасишта.
-Го видов соопштението. Нормално е така да делува опозициска партија, иако ова соопштение ми изгледа многу познато и вакви соопштенија читав и пред 3,4,5 години од други партии. Тие ме ставија на оваа позиција и пред неколку години доста ја фалеа мојата работа. Сепак, ги разбирам. За разлика од минатата година, сега имаме огромен број на специјални возила и ако пресметам во тонови со вода, мислам дека разликата е навистина огромна, кажа меѓу другото Ангелов на денешната прес-конференција.