Собранието денеска преку скратена постапка го одби предлогот-законот на пратеничката група на опозициската Левица за заштита на името Внатрешна македонска револуционерна организација – ВМРО и за забрана тоа да биде назив на име на партија.
Пред гласањето, лидерот на Левица Димитар Апасиев од собраниската говорница порача дека предлогот е генерациски чекан односно едно злосторничко здружение и бизнис партија, на која им е замрзнат имотот со години, се обидува патриотскиот менталитет на народот да го злоупотреби.
-За тие четири свети букви ВМРО да пропагира бизнис интерес на буржијска партија која е оттуѓена од реалноста. Патриотското крило живее во левото крило на организацијата, а тоа е олицетворено во асномските идеали или ако сакате тоа денеска е Левица. Левото крило отсекогаш било државотворно, за разлика од десното. Санданистите, Гоце Делчев и сите тие биле левичари. Вие немате никакво историско право да го носите името ВМРО затоа што вашето ВМРО – Тодоралександровистичкото било отсекогаш пробугарско, како и Ванчомихајловистичкото, и како такво е останато во народната меморија. Немате ниту морално ниту историско право да го користите, кажа Апасиев пред пратениците.
Според лидерот на Левица, сега е моментот да се пресече генерациската лага дека „ВМРО-ДПМНЕ е пропатриотска партија“.
Во својата изборна програма за ланските парламентарни избори, Левица вети законска заштита на името ВМРО и превенирање на негово користење од страна на која било политичка партија, фирма или невладина организација поради, како што се наведува во програмата, неговата емотивна злоупотреба во дневнополитички цели.