229
На новинарско прашање за предлогот за снимање на постапките на државните службеници, портпаролот на Владата, Душко Арсовски истакна дека предлогот за поставување на видео надзор и боди-камери е изнесен на вчерашната владина седница, како една од опциите и механизмите за превенирање од коруптивни дејствија и јакнење на транспарентноста при вршење на работните задачи и обврски во институциите.
„Ова не се однесува на целата администрација, туку на пример за службениците кои вршат контрола, надзор и посебни овластувања особено во процесите кои што не можат да се дигитализираат и вклучуваат неопходно учество на човечкиот фактор. Секако, дека овој предлог во следниот период детално ќе се истражи и анализира од аспект на негова имплементација, опфатот на службениците, обезбедување на сигурноста и приватноста на граѓаните, како и техничките и законските можности”, посочи Арсовски.
Тој истакна дека дигиталната трансформација на процесите е врвен приоритет на Владата, како клучен механизам за сузбивање на корупцијата, за брзи и ефикасни услуги кон граѓаните, за институции во служба на граѓаните.