Имајќи ги во предвид високите тонови кои се појавуваат во јавноста, таа можност не треба да се исклучи. Доколку било кој партнер од власта се повлече од Владата, тоа значи некакво престројување или мини-криза. Во моментов, парламентарното мнозинство е стабилно и големо и не значи инстант парламентарна криза, но секако ќе значи прераспределување на силите, вели за „Локално“ политичкиот аналитичар Петар Арсовски по најавите за несогласувања и турбуленции во владеачката коалиција, особено кај ВЛЕН и шпекулациите дека Арбен Таравари може да ја напушти коалицијата од албанскиот блок составена од четири партии.
Aрсовски оценува дека засега уставните измени односно нивното неносење не можат да бидат пресудни за оваа Влада, со оглед дека електоратот не ги поддржува.
-Тој популизам е тој што всушност ѝ дава енергија на тврдата позиција на Владата против уставните измени. Со тек на времето, тоа дистанцирање од меѓународните текови, може да ја направи Владата декадентна дома и може како второстепено да создаде некаков општествен конфликт меѓу критичките и про-ЕУ гласачите и Владата. Сепак, тој процес е се уште на почеток и тешко е да се предвиди во кој правец ќе се движи. На крајот на краиштата, целиот процес ќе зависи дали ЕУ во меѓувреме ќе го засили или намали својот сопствен кредибилитет, тврди соговорникот.
Околу тоа на кој во моментов му одговара или не му одговара двојни избори заедно наесен, аналитичарот вели дека тешко е да се одговори, но, не гледа сценарио во кое резултатите на било кои избори во октомври, ќе бидат многу различни од она што сега го имаме како распределба на политичките сили.
-Се поставува прашањето што би добила Владата или било која партија со распишување на предвремени парламентарни избори…освен можеби некаков ресет на мандатот и продолжување за една година. Потребен е општествен тригер за предвремени избори односно да се закочени некои некакви општествени процеси… Во моментот веројатноста за двојни избори е мала, но тоа може да се смени доколку ескалира состојбата со Кочани и протестите, потенцира Арсовски.
Запрашан за тоа кој може да „ќари“, а кој може да изгуби во политичка смисла по трагедијата во Кочани, аналитичарот нагласува дека во моментов, Левица е позиционирана да извлече најголем бенефит затоа што наративот на протестантите после трагедијата е дека сите досегашни етаблирани партии се виновни за нарушување на системот и дека е потребна сериозна општествена промена и некакво ново лидерство.
-Тој анти-естаблишмент наратив се поклопува со наративот на Левица и во таа смисла, партијата е позиционирана со својата политичка идеологија да извлече најголем бенефит од општествениот револт после трагедијата во Кочани, истакнува Арсовски.
На 6-ти април ќе се одржи Собранието на АА и најверојатно тогаш ќе се донесе конечна одлука дали ќе одат на локалните избори сами или заедно со коалицијата. Пред неколку дена Таравари рече дека од 100 километри се гледа дека коалицијата функционира „тромо“ и дека граѓаните имаат впечаток дека ВЛЕН има слаба позиција во владата. Сепак, еден од лидерите на заедничката коалиција кажа дека ВМРО-ДПМНЕ и премиерот Христијан Мицкоски не се виновни за ова туку вината е во самите редови на ВЛЕН.
Мора да се случат коренити реформи на системот од кој граѓаните се незадоволни, оцени претседателот на Владата Христијан Мицкоски по средбата со лидерот на СДСМ Венко Филипче. Македонските државни интереси треба да бидат појдовната точка во разговорите за секое прашање, при што премиерот од Филипче побарал да се потруди кон определбата за промени, реформи и напредок.
-Беше истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани. Во тој контекст неопходно е да се мобилизираат сите напредни поединци и структури кој можат да дадат придонес на патот за развој на земјата. Се договоривме да се формираат работни групи кои ќе разговараат за реформските законски решенија кои треба да ги гарантираат заложбите за напредок, информираа од Владата.
Состанокот беше добар и конструктивен, оцени претседателот на СДСМ, Венко Филипче по средбата. Рече дека се договориле да формираат работни групи за спроведување на реформската агенда во правосудството, енергетиката и здравството. На средбата се зборувало и за евроинтеграциите и уставните измени, но не станало збор за предвремени парламентарни избори.
Филипче негираше дека средбата имала етничка димензија. Претходно ДУИ тврдеше дека на средбата ќе се демонстрира моноетничка коалиција, чија цел е преобликување на политичкиот модел на државата од мултиетничка во моноетничка демократија.
Средбата во Владата траеше еден час и 40 минути. Следен чекор е лидерска средба и седнување на иста маса на сите претседатели на партии.
Н.П.