Мастерс турнирот во Шангај и трите други турнири што ќе се одржат во Кина оваа година изгледаат неизвесни доколку ситуацијата во земјата со КОВИД-19 не се подобри брзо, изјави претседателот на АТП – Андреа Гауденци за Ројтерс.
Кина беше домаќин на Зимските олимписки игри под строги здравствени мерки во февруари, но речиси сите други меѓународни спортски настани во земјата оваа година беа откажани или одложени.
Четирите турнири, вклучувајќи го и Мастерсот во Шангај, се закажани за септември и октомври, а Гауденци рече дека одлуката за нивната судбина ќе биде донесена следниот месец.
„Одлуката ќе биде донесена наскоро. Разговараме за мерките против коронавирусот со нив. Но, мислам дека ако протоколите се премногу строги, веројатно нема да ги натера играчите да летаат таму и да ги стават во карантин. Ситуацијата е доста предизвикувачка во Кина. Не сме донеле одлука, но тоа треба да го направиме следниот месец“, додаде Гауденци.
Отвореното првенство на Франција неодамна се одржа без никакви здравствени ограничувања во Париз, а играчите веројатно нема да се согласат да одат во Кина доколку има некој период на изолација.
Покрај Мастерс турнирот во Шангај од 9 до 16 октомври, Кина ќе биде домаќин на натпревари во Ченгду и Жухаи на 26 септември, како и во Пекинг од 3 до 9 октомври.
Минатата година, Мастерс турнирот во Индијан Велс беше поместен за октомври од вообичаеното време во март за да се пополни празнината што ја остави со откажувањето на турнирите во Кина.
„Малку е веројатно да се најде таква престижна замена доколку тие повторно се укинат оваа година“, рече Гауденци.
„Мораме да бидеме подготвени да го прилагодиме календарот и да најдеме нови домаќини доколку е потребно, како што правевме во последните две години. Но, секогаш постои надеж дека ситуацијата може да се промени. Ќе се прилагодиме колку што можеме“, додаде тој.
Женската тениска асоцијација нема закажани турнири во Кина за 2022 година, бидејќи ВТА работи на изнаоѓање решение за проблемот со кинеската тенисерка Шуаи Пенг.
АТП останува посветена на организирање турнири во земјата и минатата недела објави дека Мастерсот во Шангај е меѓу петте турнири од серијата АТП 1000 што ќе се играат во текот на 12 дена од 2023 година.